Пайвастан ба маркази ягонаи энергетикӣ наздик аст

Хоруғ 8.08.2014. (АМИТ «Ховар» , Файз Мирасан).- Солҳои охир сифати барқрасонӣ ба муштариёни шаҳру ноҳияҳои Вилояти Мухтори Кӯҳистони Бадахшон сарфи назар аз фаслхои сол хеле беҳтар гардид. Ин неъмати бебаҳоро тоҷикони кӯҳистон аз ғамхориҳои ҳамарӯзаи Ҳукумати Ҷумҳурии Тоҷикистон арзёбӣ менамоянд. Бо иқдоми нек ва бунёдкоронаи Сарвари мамалакат Эмомалӣ Раҳмон 20 сол қабл дар вазъияти вазнини сиёсию иқтисодӣ аввалин дастгоҳи неругоҳи барқи обии «Помир» мавриди баҳрабардорӣ қарор гирифт ва минбаъд ба таҷдиду бунёди неругоҳҳои хурди барқӣ асоси воқеӣ гузошт. Ширкати «Помирэнерҷи» имрӯз бисёр барномаҳои азими энергетикиро бо дастгирии Ҳукумати Ҷумҳурии Тҷикистон амалӣ мегардонад. Ба мақсади интиқоли босифати неруи барқ ба истеъмолкунандагон аввалин маротиба дар вилоят бунёди хатти баландшиддати дузанҷира шуруъ гардид. Соли гузашта дар масофаи 10 км аз шаҳри Хоруғ то деҳаи Гожаки ҷамоати Дарморахт хатти баландшиддат бо насб гардидани сутунҳои оҳанини баландиаш то 28 метр ба анҷом расонда шуд. Дар амалӣ гардондани ин лоиҳаи мураккаб кормандони техникии ҷамъияти саҳҳомии шакли пӯшидаи «Бадахшон ТАДЭС» ҳиссаи шоиста доранд. Ба гуфти раиси ҷамъияти мазкур Амрихудо Назархудоев, мо кӯшиш намудем, ки ҳамаи сутуну симҳои барқӣ дар кӯҳдоманҳо, дар як ҷои дур аз офати табиӣ васл карда шаванд.