С. Лисовский: «Маскав омодааст марказҳои логистикӣ кушояд»

Душанбе, 13.08.2014.(АМИТ «Ховар», Марзия Саидзода).- «Маскав омодааст барои дастгирии истеҳсолкунандагони Тоҷикистон ва истеъмолкунандагони Русия технологияҳои муосири истеҳсол ва ба содирот омода кардани меваю сабзавотро ворид карда, бо ташкили марказҳои логистикӣ теъдоди фармоишҳоро барои харидории навъҳои гуногуни маҳсулоти кишоварзӣ аз Тоҷикистон мушаххас намояд». Ин матлабро Сергей Лисовский — раиси Кумитаи Шӯрои Федератсияи Маҷлиси Федералии Федератсияи Русия оид ба масъалаҳои сиёсати аграрию озуқаворӣ ва истифодаи захираҳои табиат зимни мулоқоташ бо Маҳмадсаид Убайдуллоев -раиси Маҷлиси миллии Маҷлиси Олии Ҷумҳурии Тоҷикистон дар Душанбе иброз намудааст. Мусоҳибон ба тавсеаи равобити ҳасанаи Тоҷикистону Русия, хусусан ҳамкориҳои байнипарлумонии ду кишвар баҳои баланд дода, дурнамои онро нек арзёбӣ карданд. Зикр шуд, ки баргузории Форуми байнипарлумонии «Тоҷикистону Русия: ҳамкориҳои байниминтақавӣ», ки октябри соли равон дар Маскав доир мегардад, дар тақвияти ҳамкориҳои иқтисодию тиҷоратии Тоҷикистоун Русия нақши муассир хоҳад гузошт. Ҷонибҳо дар доираи баргузории Форум матраҳ намудани масъалаи истеҳсол, коркард ва интиқоли меваю сабзавотро аз Тоҷикистон ба бозорҳои Русия мувофиқи мақсад шумориданд. Интизор меравад, дар моҳи октябр ки ҷиҳати иштирок дар Форуми байнипарлумонии Тоҷикистону Русия ҳайати парлумонии Тоҷикистон таҳти роҳбарии Маҳмадсаид Убайдуллоев -раиси палатаи болоии Парлумони ҷумҳурӣ бо сафари расмӣ ба Русия хоҳад рафт.