“Шири модар — сарчашмаи муваффақ шудан дар ҳаёт”

Душанбе, 11.08.2014. (АМИТ «Ховар», Мавҷуда Анварӣ).- Ҳамасолда даҳаи аввали моҳи август ҳафтаи умумиҷаҳонии ҳимояи ғизодиҳии табиии кӯдакон таҷлил карда мешавад.Бо ташаббуси Вазорати тандурустӣ ва ҳифзи иҷтимоӣ аз 1-ум то 10-уми август дар Маркази саломатии шаҳри Чкалов чорабиние бо шиори “Шири модар — сарчашмаи муваффақ шудан дар ҳаёт” гузаронида шуд. Дар ин замина бо аҳолӣ дар робита ба аҳамияти ғизои табиӣ-шири модар суҳбату вохӯриҳо доир гардид. Тавре сарвари марказ — Малика Қосимова иттилоъ дод, аз ҷониби мутахассисони Маркази солимии репродуктивӣ, табибони оилавии Маркази саломатии шаҳр дар ин давра дар мавзӯи пешгириии бемориҳои сироятӣ, аҳамияти шири модар, пешгирии бемориҳои кӯдакона ва дар маҷмӯъ оид ба баланд бардоштани солимии ҷомеа ва тарғиби ҳаёти солим бо аҳолӣ вохӯриҳо гузаронида шудааст.Ба ақидаи мутахассисони соҳаи тиб шири модар дар самти пешгирии бемориҳои кӯдакона, аз ҷумла бемориҳои дарунравӣ, роҳи нафас, камвазнӣ ва камхунӣ ягона васила буда, кӯдакро аз дигар бемориҳо эмин нигоҳ медорад ва ҷиҳати солиму бардавом ба воя расидани он таъсири беш мерасонад. Ба ин хотир табибон тавсия медиҳанд, ки кӯдак бояд то синни 2-солагиаш дар баробари дигар маводи ғизоии иловагӣ аз шири модар низ истифода барад.