Сокинони Чорсада ба маҳалли нав кӯч бастанд

Душанбе, 28.08.2014. (АМИТ «Ховар», Лайло Тоирӣ).-«81 хоҷагии деҳаи Чорсадаи ноҳияи Нуробод ба озод намудани минтақа шурӯъ намуда, сокинони 31 хоҷагии ин деҳа ба маҳалли нави зист кӯч бастанд»,- гуфт  мутахассиси пешбари бахши муҳоҷирати экологии Хадамоти муҳоҷирати Вазорати меҳнат, муҳоҷират ва шуғли аҳолии ҶТ Ислом Раҳматулоев. 
Бино ба иттилои шуъбаи муносибатҳои байналмилалӣ, робита бо ҷомеа ва ҳамватанони бурунмарзии Хадамоти муҳоҷират вобаста ба масъала тибқи фармоиши Мақомоти маҳаллии ҳокимияти давлатии ноҳияи Нуробод дар деҳаи Чорсада Ситоди муҳоҷират ташкил шуда, ба он намояндагони тамоми сохторҳои идораҳои давлатии ноҳия шомил  шудаанд. 
Дар айни замон, дар миёни аҳолии деҳаи Чорсада, ки 146 хоҷагиро ташкил менамояд, бо мақсади дарки моҳияти масъала корҳои иттилоотию фаҳмондадиҳӣ гузаронида шуда истодаанд.  
Барои кўчонидани молу амволи аҳолии деҳаи Чорсада 29 адад мошинҳои боркаш ҷудо шудааст. Кўчонидани муҳоҷирон аз деҳаи Чорсада муташаккилона идома дорад.