Талаботҳои нави Россия аз муҳоҷирон
Душанбе, 11.08.2014. (АМИТ «Ховар», Суғдмеҳри Маъруфзод).- Шурўъ аз аввали соли ҷорӣ шаҳрвандони хориҷие, ки дар қаламрави Федератсияи Россия дар давоми 90-рўз аз лаҳзаи воридшавиаш иҷозат барои кор ё патентро дастрас накардааст, бояд ҳудуди онро тарк намояд. Зимнан, шаҳрвандон танҳо баъд аз 90-рўзи аз саннаи хориҷшавиашон аз ҳудуди Федератсияи Россия ҳуқуқи дигарбора бозгашт ба ин кишварро барои фаъолияти меҳнатӣ доранд. Гуфта мешавад, қаблан чунин талабот ҷой надошт ва шаҳрвандон метавонистанд, баъд аз як рўз аз саннаи хориҷшавиашон ба Федератсияи Россия бозпас гарданд. Ҳамчунин, шурўъ аз якуми январи соли 2015 воридшавӣ ва хориҷшавӣ, ҳамчунин убури транзитии қаламрави Федератсияи Россия аз ҷониби шаҳрвандони хориҷӣ, аз ҷумла шаҳрвандони Тоҷикистон танҳо бо шиносномаҳои хориҷии стандарти байналмиллалӣ ба роҳ монда мешавад. Бино бар ин, шаҳрвандоне, ки шурўъ аз аввали соли 2015 бо мақсади будубош ва кор кардан ба Федератсияи Россия рафтаниянд ё дар қаламрави ин давлат иқоматро идома доданианд, инчунин барои убури транзити қаламрави ин давлат бояд шиносномаи хориҷии стандарти байналмиллалиро дастрас намоянд. Ҳамзамон, шурўъ аз аввали соли 2015 барои дастрас намудани иҷозати кор ва патент ҷиҳати ишғоли ҷойҳои корӣ дар ҳудуди Федератсияи Россия барои шаҳрвандони хориҷӣ санҷиши донистани забони русӣ, таърихи давлат ва ҳуқуқ ба роҳ монда шудааст. Танҳо шахсони баландихтисос, маъюбон ва кўдакони то 18-сола аз супоридани чунин имтиҳон озоданд.