Тарбуррӣ — сарбуррӣ мегӯянд

Панҷакент. (АМИТ «Ховар», Гулибаҳор Худойбердиева). Масъулини муассисаи давлатии хоҷагии ҷангали шаҳри Панҷакент дар шаш моҳи соли ҷорӣ нисбати 62 нафар оид ба худсарона буридани дарахтон, шикори ҳайвонот ва дигар равандҳои рафтори ғайриқонунӣ нисбат ба хоҷагии ҷангал санад тартиб дода, маблағи 23491 сомонӣ ҷаримабандӣ намуд.Ба гуфти директории муассисаи мазкур Ҳаким Маҳкамов хоҷагӣ дорои 126 гектар замин буда аз ин шумора 108,3 гектараш ҷангалпӯш мебошад, ки дар он дарахтони писта, бодом, тафдона, санҷид, ҳулӯл, чормағз ва дигар дарахтони сояафкану мевадиҳанда парвариш меёбанд. Инчунин гиёҳҳои шифобахш аз қабили испанд, бодоми талхак, юлғун парвариш ёфта дар ин муддат 1,5 тонна ҷамоварӣ карда шудааст. Аз ҷониби муассиса ҳамасола ба муассисаи таълимӣ, беморхонаҳо, хонаи пиронсолон ба миқдори муайян ҳезум таъмин карда мешаванд.