Ташкили 10 дастаи футболи хурди мақомоти судӣ

Душанбе, 21.08.014. (АМИТ “Ховар”, Мавҷуда Анварӣ).- Дар шуъбаи Шӯрои адлияи ҶТ дар вилояти Суғд бо иштироки роҳбарони судҳои шаҳру ноҳияҳои вилояти Суғд доир ба омодагӣ ба чорабиниҳои варзишӣ бахшида ба сазовор истиқбол гирифтани ҷашнҳои 20-умин солгарди Рӯзи қабули Сарқонун ва 90-солагии мақомоти судӣ машварати корӣ баргузор гардид.
         Дар машварати корӣ аз ҳисоби кормандони шуъбаи Шӯрои адлия, судҳо, судҳои ҳарбии гарнизони Хуҷанд ва шаҳру ноҳияҳои вилояти Суғд 10 дастаи футболи хурд ташкил гардид. Тибқи қоидаҳои ФИФА  дастаҳо аз рӯи қуръакашӣ ба ду гурӯҳи иборат аз панҷ даста тақсим шуданд. Тақвими бозиҳои футболи хурд миёни 10 тими ташкилгардида бо зикри вақт ва рӯзҳои баргузории он тасдиқ гардид.
Мусобиқаи футболи хурд миёни судҳои шаҳру ноҳияҳои вилояти Суғд 25 августи соли 2014 оғоз гардида, ба истиснои рӯзи истироҳатии якшанбе ҳар рӯзе ду бозии футболи хурд, аз ҳар тими футбол як бозӣ сурат мегирад.
Бозиҳои нимниҳоӣ ва ниҳоӣ рӯзҳои 15,17 ва 18 сентябри соли 2014 доир гардида, ғолиби мусобиқа дар  пойтахти кишвар ширкат меварзад.
Баҳри дар сатҳи баланд баргузор намудани мусобиқаи футболи хурд аз ҳисоби раисони судҳои шаҳри Истаравшан, ноҳияҳои Ҷаббор Расулов ва Ашт комиссияи одоб таъсис дода шуд.