Таваҷҷуҳ ба корхонаи парвариши гулмоҳӣ дар дараи Ромит

 Душанбе, 28.08.2014. (АМИТ «Ховар»). -Дар дараи Ромит Сарвари давлат Эмомалӣ Раҳмон ба фаъолияти корхонаи парвариши гулмоҳӣ таваҷҷуҳ зоҳир намуда, барои ривоҷу равнақ додани ин соҳаи сердаромад ба масъулин супоришҳои мушаххас дод.
Чунонки иттилоъ доданд, ҳоло дар ҳавзҳои сунъии ин корхона беш аз 15 ҳазор дона гулмоҳӣ ва 50 ҳазор моҳичаи хурд парвариш меёбанд. Дар ин ҷо 6 намуд гулмоҳӣ мавҷуд аст, ки 2 намудаш дарёии маҳаллӣ мебошад. Аз ҳама зебо гулмоҳии зарди тиллоранг аст.
Аз аввали соли равон аз ин ҷо беш аз 3 тонна гулмоҳӣ ба бозор пешниҳод шуда, ҳоло 15 тоннаи дигар барои фурӯш омодааст. Ҳар килограми моҳӣ бо нархи 50 сомонӣ ба мизоҷон пешниҳод мешавад. Як гулмоҳӣ аз 2 то 5 кг вазн дорад.
Корхона ҳамчунин инкубатори худро дорад, ки дар он аз тухм моҳича бароварда мешавад.
Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.