Терминали нави ФБД пеш аз муҳлат ба истифода дода мешавад

  Душанбе, 20.08.2014.(АМИТ «Ховар», Марзия Саидзода).- Дар остонаи ҷашни 23-юмин солгарди Истиқлолияти давлатии Ҷумҳурии Тоҷикистон терминали нави Фурудгоҳи байналмилалии Душанбе ба истифода дода мешавад.
         Интизор меравад, ки дар маросими ифтитоҳи терминали нави «Фурудгоҳи байналмилалии Душанбе» Президенти кишвар Эмомалӣ Раҳмон, инчунин намояндагони ширкати фаронсавии «VINCI», ки дар сохтмони он саҳми муносиб доранд, ширкат намоянд. Мавриди зикр аст, ки сохтмони терминали нави «Фурудгоҳи байналмилалии Душанбе» ҳанӯз ду сол муқаддам, аниқтараш  моҳи декабри соли 2012 оғоз гардида буд. 
       Бино ба иттилои Муҳаммадюсуф Шодиев-котиби матбуотии «Фурудгоҳи байналмилалии Душанбе» дар сурати ба истифода додани терминали нави фурудгоҳ сатҳу сифати  хизматрасониҳо дар фурудгоҳ баланд бардошта шуда, он ҷавобгӯи талаботу меъёрҳои байналмилалӣ мегардад.