Ван Йи: «Чин Тоҷикистонро дастгирӣ менамояд»

Душанбе, 01.08.2014. (АМИТ «Ховар», Муқаддас Темурзода).- Баъд аз анҷоми мулоқот бо Президенти Ҷумҳурии Тоҷикистон Эмомалӣ Раҳмон вазири корҳои хориҷии Ҷумҳурии Мардумии Чин Ван Йи андешаҳояшро ба хабарнигорон чунин баён намуд:«Суҳбати мо бо Президенти Ҷумҳурии Тоҷикистон дар фазои хеле дӯстонаву созанда баргузор гардид. Нахуст мо рушди ҳамкориҳои гуногунҷабҳаи тарафайнро муҳокима намудем. Таваҷҷуҳи зиёд ба омодагӣ ба сафари давлатии Раиси Ҷумҳурии Мардумии Чин Си Ҷинпин ба Тоҷикистон ва ҳамоиши навбатии сарони давлатҳои аъзои Созмони ҳамкории Шанхай, ки моҳи сентябри соли равон дар шаҳри Душанбе баргузор мегардад, зоҳир гардид. Тоҷикистон, ки имсол раёсати СШҲ -ро ба ӯҳда дорад, барои дар сатҳи олӣ гузаронидани ин чорабинии муҳим мо омодаем, ки ин кишварро ҳамаҷониба дастгирӣ намоем».«Сафари қарибулвуқӯи Раиси Ҷумҳурии Мардумии Чин Си Ҷинпин ба Тоҷикистон барои иштирок дар ҳамоиши навбатии сарони давлатҳои аъзои СҲШ бори нахуст мебошад ва мо умедворем, ки ин сафар ба ҳамкориҳои ҳарду кишвар вусъати тоза зам менамояд. Хусусан сафари давлатии Раиси Ҷумҳурии Мардумии Чин ба Тоҷикистон барои тавсия бахшидан ба дӯстии самимӣ ва ҳамдигарфаҳмии Сарони кишварҳои мо мусоидат менамояд»,- иброз намуд вазири корҳои хориҷии Ҷумҳурии Мардумии Чин.Ван Йи ҳамчунин зикр намуд, ки зимни мулоқот ба густариши робитаҳои судбахш миёни сохторҳои низомию амниятии ду кишвар дар самти нигаҳдории амну суботи минтақавӣ таваҷҷуҳи махсус зоҳир гардид.