Вазъи нигаронкунандаи нашъамандӣ

Душанбе, 23.08.2014. (АМИТ «Ховар», Мавҷуда Анварӣ).-   Дар доираи амалиёти ҷумҳуриявии «Кӯкнор — 2014» ва омӯзиши фаъолияти шӯроҳои ҳамоҳангсозӣ оид ба пешгирии сӯйистеъмоли маводи нашъадори шаҳру ноҳияҳои ВМКБ оид ба татбиқи «Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон» рӯзҳои 20 ва 21 августи соли ҷорӣ дар ноҳияҳои Мурғоб ва Роштқалъа бо аъзои ситоди амалиёти ноҳиявии «Кӯкнор-2014» ва шӯроҳои ҳамоҳангсозӣ оид ба пешгирии сӯйистеъмоли маводи нашъадори ноҳияҳои мазкур ҷаласаҳо гузаронида шуданд.
Роҳбарияти ин ду ноҳия дар навбати худ ҷиҳати беҳбудӣ бахшидан ба фаъолияти зиддинашъамандӣ ва ҷоннок кардани шӯроҳои мазкур ба сохторҳои дахлдор супоришҳо доданд.
Ҳамчунин дар ноҳияи Роштқалъа рӯзи 21 август чорабинии оммавию фарҳангии зиддинашъамандиро таҳти шиори «Тоҷикистон зидди мухаддирот» бо иштироки доираи васеи аҳолии ин ноҳия баргузор намуданд. 
Ҳадаф аз баргузории ин чорабинӣ баланд бардоштани маърифати зиддимухадиротии шаҳрвандон арзёбӣ мешавад. Роҳбарияти ноҳияи Роштқалъа таъкид доштанд, ки дар ҳамкорӣ дар самти пешгирии нашъамандӣ ва мубориза бо муомилоти ғайриқонунии мухаддирот кори зиёдро ба анҷом расонидан имконпазир аст. 
Чунин чорабиниҳои зиддинашъамандӣ дар ноҳияҳои Шуғнон, Рӯшон ва Ванҷ ба нақша гирифта шудааст.