Вохӯрӣ дар кисми низомии гарнизонӣ

Душанбе, 29.08.2014. (АМИТ «Ховар», Лайло Тоирӣ).-   Бо мақсади бурдани корҳои фаҳмондадиҳӣ ҷиҳати пешгирии содиршавии ҷиноят дар яке аз қисмҳои низомии гарнизони Душанбе вохӯрӣ баргузор гардид.
Дар он масъулини коллегияи ҳарбии суди олии Ҷумҳурии Тоҷикистон бо таълимгирандагони Мактаби прапоршикон ва афсарону сарбозони қисми низомии 08010-и Қӯшунҳои хушкигарди Вазорати мудофиа вобаста ба таҷлили ҷашнҳои сатҳи давлатӣ ва дигар масъалаҳое, ки ба фаъолияти хизматчиёни ҳарбӣ мансубанд, ибрози назар карданд.
Таваҷҷуҳи ҳозирин ба пешгирӣ аз амалҳои ғайриоинномавӣ ҷалб шуд ва  риояи интизоми намунавиро зимни хизмати ҳарбӣ омили асосии пешрафти қисми низомӣ арзёбӣ намуданд. Зикр шуд, ки рӯз то рӯз сатҳи хизмат дар сафи Артиши миллӣ хубтар гашта, барои беҳбуд бахшидан ба ин раванд аз ҷониби давлату ҳукумати кишвар пайваста тадбирҳои зарурӣ андешида мешаванд. 
Хадамоти матбуоти Вазорати мудофиаи ҷумҳурӣ иттилоъ медиҳад, ки  чунин вохӯриҳои судбахш дар арафаи ҷашнҳои миллию сиёсӣ бо хизматчиёни низомии ҷузъу томҳои Қувваҳои Мусаллаҳи кишвар минбаъд низ гузаронида хоҳанд шуд.