Вохӯрии ситоди нави мураббиҳои бахши футзал

Душанбе, 28.08.2014. (АМИТ «Ховар»). – 27 август дар  шаҳри  Душанбе  аввалин  вохӯрии  ситоди  нави  мураббиҳои  дастаи мунтахаби  Тоҷикистон оид ба  футзал бо  номзадҳои  дастаи  мунтахаб  баргузор  гардид. 
Тавре  ки  аз Федератсияи  футболи  Тоҷикистон  хабар  доданд, зимни  вохӯрӣ  сармураббии  нави  дастаи  мунтахаб  Ҳусейн  Шодиев  ҳозиронро бо нақшаи  омодагӣ ба бозиҳои  интихобии  мусобиқоти  Осиё – 2016, ки  дар  охири  соли  оянда  баргузор  мегардад, шинос  кард.
Ба  гуфтаи  Ҳусейн  Шодиев,  дастаи  мунтахаби  кишвар  пеш аз оғози  бозиҳои  интихобӣ қариб  10  вохӯрии  рафиқона  анҷом  медиҳад. 
Ёдовар  мешавем, ки  24 август  дар  шаҳри  Душанбе бори нахуст  дар таърихи  футзали  Тоҷикистон  мусобиқоти  дастаҳои  лигаи  касбӣ  оғоз ёфт, ки  дар  он 8 даста  иштирок  менамояд. 
Дар рӯзи  аввали оғози  мусобиқот дастаҳои «Газпром» — и  шаҳри  Душанбе ва «Самандар» — и  шаҳри  Турсунзода қувваозмоӣ  намуда,  дар  он  футболбозони  пойтахт  бо  ҳисоби  7:2 пирӯз  шуданд.