Ғолибони озмуни «Рӯдакихонӣ» муайян шуданд

Душанбе, 23.09.2014. (АМИТ Ховар, Ситораи Боймурод).- Дирӯз дар  китобхонаи вилоятии оммавии ба номи Т. Асирӣ бахшида ба Рӯзи Рӯдакӣ озмуни вилоятии «Рӯдакихонӣ» баргузор гардид. Тавре ки дар ин бора хадамоти матбуоти раиси вилояти Суғд хабар додааст, дар озмун 85 нафар наврасону ҷавонони аз 10 то 30 сола аз шаҳру ноҳияҳои вилоят ва донишгоҳҳо иштирок намуданд. Аз ҷониби иштирокчиён шеърҳо аз эҷодиёти Рӯдакӣ дар муддати 5-7 дақиқа қироат шуданд, ки аъзои ҳакамон ба маҳорату истеъдоди наврасону ҷавонон баҳогузорӣ намуданд.
Ҳамин тавр ҷои аввал ба донишҷӯи Донишгоҳи давлатии Хуҷанд Хосияти Шаҳобиддин, ҷойи дуюм ба Моҳира Бобоҷонова, хонандаи мактаби таҳсилоти умумии №10-и шаҳри Хуҷанд, ҷойи сеюм ба Мавлуда Раҳимова аз шаҳри Панҷакент насиб гардида, ғолибон бо туҳфаҳои хотиравии Раёсати фарҳанг сарфароз гардиданд.