Ҷамъбасти озмуни “Навқаламони наврас”

Душанбе, 06.09.2014. (АМИТ «Ховар», Раъно Нусратуллозода).-Дирӯз дар Китобхонаи миллии Тоҷикистон мулоқоти аъзои толори кӯдакону наврасон ва хонандагони мактабҳои таҳсилоти ҳамагонӣ бо адибони шинохта Ғанӣ Ҷӯразода ва Алӣ Бобоҷон баргузор гардид. Тавре ки аз Китобхонаи миллии Тоҷикистон иттилоъ доданд, дар доираи ҳамин мулоқот озмуни “Навқаламони наврас”, ки аз 1 август то 1 сентябр давом дошт, ҷамъбаст гардид.Дар ҷамъомад муовини директори китобхона Шариф Комилзода ғолибони озмунро табрик намуда, туҳфаҳои хотирмон ва Ифтихорномаи Китобхонаи миллиро супорид. Дар озмун ҷои аввал ба Гулафзои Умед, хонандаи синфи 3, ҷои дуюм ба Бузургмеҳри Ҳаким, хонандаи синфи 9 ва ҷои сеюм ба Кароматуллои Эмомалӣ, хонандаи синфи 10 сазовор дониста шуд. Сипас, адибони шинохтаи ҷумҳурӣ Ғанӣ Ҷӯразода ва Алӣ Бобоҷон аз эҷодиёти хеш барои кӯдакон қиссаҳои ҷолиб қироат намуданд. Дар чорабинӣ, ҳамзамон суруд ва рақсҳои ҷолиб низ аз ҷониби кӯдакону наврасон намоиш дода шуда, дар охири чорабинӣ ба кӯдакони фаъоли ин толор туҳфаҳои хотирмон супорида шуд. Ғанӣ Ҷӯразода китоби тозанашри худро бо номи “Панди бобо” бо соядасташ ба иштирокдорони маҳфил тақдим намуд.