Барафрохтани Парчами Тоҷикистон дар Куриё

Душанбе, 19.09.2014. (АМИТ “Ховар”, Ситораи Боймурод).- Дирӯз дар деҳаи Бозиҳои XVII осиёӣ дар шаҳри Инчони Кореяи Ҷанубӣ Парчами давлатии Ҷумҳурии Тоҷикистон барафрохта шуд.
Тавре ки дар ин бора Кумитаи миллии олимпии кишвар хабар додааст, дар ин маросими ботантана нахуст раиси Деҳаи Бозиҳои XVII осиёӣ ҳайатҳои варзишии Тимори Шарқӣ, Ӯзбекистон, Ҳиндустон, Тайван, Тоҷикистонро хайра мақдам гуфта, барои ширкаташон дар ин чорабинии бузурги варзишӣ изҳори сипос намуд. Сипас парчамҳои давлатии ин кишварҳо, аз ҷумла Тоҷикистон таҳти садои сурудҳои миллии кишварҳо барафрохта шуданд. 
Ёдовар мешавем дар Бозиҳои XVII осиёӣ, ки аз 19-уми сентябр то 4-уми октябри соли равон дар шаҳри Инчони Кореяи Ҷанубӣ барпо мегарданд, ҳайати варзишии Тоҷикистон бо шумули беш аз 150 нафар, аз ҷумла 92 варзишгар, ки 16 нафараш зан аст, ширкат мекунад.
Дар ин мусобиқоти бузургтарини қитъавӣ варзишгарони тоҷик аз рӯи 16 намуд — бокс, дзюдо, гӯштини озод, гӯштини юнониву румӣ, варзиши сабук, тирандозӣ, футбол, шиноварӣ, каратэ, таэквондо ВТФ, вазнбардорӣ, камонварӣ, ушу, софт теннис, қаиқронӣ ва волейболи соҳилӣ рақобат хоҳанд кард.
Гуфта мешавад, ки тими мунтахаби Тоҷикистон аз соли 1994 барои бори шашум дар Бозиҳои осиёӣ ширкат меварзад. Дар Бозиҳои пешин варзишгарони тоҷик ҳамагӣ 16 медал ба даст овардаанд, ки сетоаш тилло, дутоаш нуқра ва ёздаҳтоаш биринҷӣ мебошад. Аз он ҷумла, ду медали тилло ба Дилшод Назаров, гурзандози машҳури тоҷик мансуб аст. Як медали дигари тиллоро Ҷаҳон Қурбонов, муштзани маъруфи тоҷик ба даст овардааст.