Баррасии ҳуқуқҳои муҳоҷирони меҳнатӣ дар форум

Душанбе, 19.09.2014. (АМИТ «Ховар», Лайло Тоирӣ).- 5-умин Форуми минтақавии «Самаранокии воситаҳои ҳимояи ҳуқуқии муҳоҷирони меҳнатӣ ва аҳли оилаи онҳо аз Осиёи марказӣ дар кишварҳои қабулкунанда» дар  Китобхонаи миллии Тоҷикистон ду рӯз боз идома  дорад.
Дар  форум масъалаи мушкилоти муҳоҷирони меҳнатӣ аз ҷумҳуриҳои Тоҷикистон ва Қирғизистон, ки бештар ба Русия ва Қазоқистон сафар мекунанд, баррасӣ гашта,  роҳҳои ҳалли ин мушкилот ба сохторҳои дахлдор  ва ташкилотҳои ҷамъиятие, ки ба ҳимояи ҳуқуқи инсон ва муҳоҷирони меҳнатӣ машғуланд, пешниҳод мешавад.
Дар  форуми минтақавӣ ҳолати дастрасии муҳоҷирони меҳнатӣ аз Тоҷикистон ва Қирғизистон ба хизматрасонии консулӣ ва дигар механизмҳои ҳифзи ҳуқуқӣ муайян шуда, ҳамкориҳои ваколатдорони ҳифзи ҳуқуқи инсон оид ба ҳимояи ҳуқуқии муҳоҷирони меҳнатӣ муайян мегардад.
Форум аз ҷониби Ташкилоти ҷамъиятии «Марказ оид ба ҳуқуқҳои инсон» дар доираи лоиҳаҳо оид ба муҳоҷирати меҳнатӣ, ки бо дастгирии DCA Central Asia, Bread for the World ва Иттиҳоди Аврупо амалӣ мегардид ва Платформаи ҳамкориҳои шаҳрвандӣ «Осиёи Марказӣ дар рушд» баргузор гардида истодааст.