Бунёди ду иншоот дар ноҳияи Рашт
Душанбе, 26.09.2014. (АМИТ Ховар, Мавҷуда Анварӣ).- Дирӯз бо иштироки вазири корҳои дохилӣ Раҳимзода Рамазон дар РВКД минтақа ва ноҳияи Рашт ду иншооти нав дармонгоҳи тиббӣ ва қисми мустақили №40 оид ба муҳофизати шаҳраки Ғарми шуъбаи Хадамоти давлатии оташнишонии гурӯҳи ноҳияҳои Рашти СХДО ВКД ба истифода дода шуд.
Тавре ки Маҳбуба Гулова, корманди ВКД ба хабарнигори АМИТ «Ховар» иброз намуд, дар маросими кушодашавии иншооти мазкур раиси ноҳияи Рашт Абдураҳмонзода Саидумрон Назар, сардори РВКД дар минтақа ва ноҳияи Рашт Шафизода Рустам Исмоил ширкат варзиданд.
Нахуст ифтитоҳи дармонгоҳи тиббии РВКД дар минтақа ва ноҳияи Рашт, ки тоза бунёд гардида, бо тамоми таҷҳизоти замонавӣ муҷаҳҳаз мебошад, оғоз гардид.
Вазири корҳои дохилӣ зимни боздид аз Дармонгоҳи тиббӣ иброз намуд, ки роҳбарияти давлату ҳукумат барои беҳтар намудани шароити хизмативу иҷтимоии кормандон доимо ғамхорӣ зоҳир менамояд. Рамазон Раҳимзода ба дармонгоҳи тиббии мазкур як адад мошини сабукрави тамғаи «ВАЗ-012» барои истифодаи хизматӣ ва сари вақт ба беморон мадади тиббӣ расонидан тақдим намуд.
Ин дармонгоҳ на танҳо ба ҳайати шахсии мақомоти корҳои дохилӣ, балки ба тамоми сокинони атрофи шаҳраки Ғарм хизмат хоҳад расонд.
Сипас, маросими кушодашавии бинои дуошёнаи қисми мустақили №40 оид ба муҳофизати шаҳраки Ғарми шуъбаи Хадамоти давлатии оташнишонии гурӯҳи ноҳияҳои Рашти СХДО ВКД бо шукӯҳу шаҳомат оғоз гардид.
Ин бино бо дастгирии роҳбарияти Вазорати корҳои дохилӣ, ҳукумати ноҳияи Рашт ва соҳибкорони ин ноҳия амалӣ гардида, дар он тамоми шароитҳо барои хизмат фароҳам оварда шудааст.
Вазири корҳои дохилӣ дар назди ҳайати шахсӣ таъкид намуд, ки дар баробари ин дастгирию ғамхориҳо хизматчиён бояд аз тамоми имкониятҳои мавҷуда истифода бурда, маҳорату малакаи касбии худро мунтазам сайқал диҳанд.