Бунёди иншоотҳои соҳаи маориф

Душанбе, 6.09.2014. (АМИТ «Ховар», Зарангези Латиф).- Президенти кишвар пайваста таъкид менамояд, ки соҳаи маориф ва илм ҳамчун соҳаи калидӣ ва омили асосии таъмини амнияти миллӣ, зарурати дастгирӣ ва баланд бардоштани мавқеи омўзгор ҳамчун меҳвари асосии ҷомеа мебошад. Аз ин хотир давлату ҳукумат баҳри пешрафти соҳаи мазкур тамоми чораҳои заруриро меандешад.Аз ҷумла, дар соли ҷашнҳои бузурги давлатӣ бо маблағгузории мақомоти иҷроияи ҳокимияти давлатии вилояти Суғд теъдоди зиёди иншоотҳои зарурии ҷомеа сохта шуда, қисме аз онҳо ба истифода дода шуданд.Аз ҷумла, дар соҳаи маориф соли ҷорӣ бунёди 18 иншоот ба нақша гирифта шуда, то имрӯз 8 мактаб омода шудааст. Мактаби № 43 — и шаҳри Конибодом, мактаби № 75 — ноҳияи Бобоҷон Ғафуров, мактаби № 24 — и ноҳияи Бобоҷон Ғафуров, ки бевосита бо иштироки Президенти кишвар ифтитоҳ шуд, мактаби № 22 — и ноҳияи Зафаробод, мактаби № 41 — и шаҳри Истаравшан, мактаби № 29 — и ноҳияи Бобоҷон Ғафуров, мактаби № 6 — и ноҳияи Ғончӣ ва ҳамчунин бунёди мактаб дар ноҳияи Шаҳристон аз ин қабил иншооти бунёдшуда мебошанд.Барои бунёди ин мактабҳо, ки дорои зиёда аз 2 ҳазору 300 ҷои нишаст мебошанд, наздик ба 20 миллион сомонӣ харҷ шудааст.