Бузургдошти Мавлоно Ҷомӣ дар диёри Гёте

 
Душанбе, 27.09.2014. (АМИТ «Ховар»). — Ҷиҳати таҷлили 600-солагии зодрӯзи Мавлоно Абдураҳмони Ҷомӣ ва гиромидошти солгарди забони тоҷикӣ Сафорати Ҷумҳурии Тоҷикистон дар Олмон баргузор намудани чорабинии илмӣ-фарҳангиро ба нақша гирифтааст. 
Дар конфронси илмӣ бахшида ба ин ду ҷашни муҳим, ки 2 октябри соли 2014 баргузор мегардад, олимону донишмандон ва шарқшиносони Олмон, намояндагони корпусҳои дипломатӣ, инчунин устодони муассисаҳои илмӣ, намояндагони диаспораи тоҷикистониён дар Олмон ва донишҷӯёну толибилмони факултаҳои шарқшиносӣ иштирок хоҳанд кард. 
Дафтари матбуоти Сафорати Тоҷикистон дар Олмон иттилоъ медиҳад, ки дар конфронси илмӣ мавқеъ ва мартабаи Абдураҳмони Ҷомӣ ҳамчун шоир ва мутафаккир дар рушди тамаддун ва адабиёти форсу тоҷик мавриди баррасӣ қарор гардида, саҳми асарҳои таълифнамудаи ӯ ҳамчун маъхазҳои муҳими илмию таърихӣ ва ганҷинаи нотакрори мардумони форсизабон мавриди баҳсу мунозираи иштирокчиён қарор хоҳад гирифт. 
Бо ибтикори Сафорат филми мустанад дар бораи ҳаёт ва фаъолияти ин мутафаккири тоҷик, ҳамчунин намоишгоҳи китобҳои ӯ омода гардида, дар рӯзи баргузории чорабинӣ пешкаши иштирокчиён хоҳад гардид.