Чопи девони ашъори Давлат Сафар дар Кобул

 
Душанбе, 22.09.2014. (АМИТ «Ховар»).-Ба тозагӣ дар Бунгоҳи интишороти Майванди шаҳри Кобул девони ашъори шоири тавонманди тоҷик Давлат Сафар бо ҳуруфоти форсӣ нашр гардид. Ин маҷмӯа гулчини ашъори ӯст, ки дар солҳои гуногун эҷод шуда, ба муносибати 20-солагии Истиқлоли Тоҷикистон рӯи чоп омадааст. Эҷодиёти Давлат Сафар моломол аз муҳаббат ба Ватан, таърихи гузашта ва имрӯзи миллату мардуми заҳматкаш ва самимии тоҷик аст. 
Қобили зикр аст, ки китоби мазкур бо кӯшиши доктор Шамсулҳақ Ориёнфар омода шудааст.
Арзишҳо ва андешаҳову дардҳое, ки дар ин маҷмӯа бозтоб ёфтаанд, инъикоси эҳсосотест, ки инсонҳо ва миллатҳои ҳамсоя- Тоҷикистону Афғонистон дар ҳаёти рӯзмарраи хеш таҷриба намудаанд. 
Ёдовар мешавем, ки то имрӯз Давлат Сафар маҷмӯаи шеърҳои  худро таҳти унвони «Пайғоми ашк», «Шеъри гаҳвора», «Шаҳбол» ва «Авҷи парвоз» пешкаши мухлисонаш гардонидааст.