Дар ПСС ҶТ маркази хидматрасонӣ ифтитоҳ мешавад

Душанбе, 29.09.2014. (АМИТ «Ховар», Кристина  Эрлих ). – Охири  ҳафтаи  гузашта раиси Палатаи  савдо  ва  саноати  Тоҷикистон Шариф  Саид  бо  мушовири  миллӣ  оид ба стандартҳо  ва  идораи  сифати  Маркази   байналмилалии  савдо Шиам К. Гуанҷур  мулоқот  анҷом  дод. Дар  ин  бора  аз маркази  матбуоти  ПСС ҶТ  ба  АМИТ «Ховар»  хабар  доданд. 
Дар  ҷараёни  мулоқот  ду  масъалаи  асосӣ: таъсиси маркази  хидматрасонӣ таҳти васояти  ПСС ҶТ  ва  принсипҳои  стратегияи  бехатарии  маводи  озуқа  дар  бахши  фаъолияти  палата  мавриди  муҳокима  қарор  гирифт.
 Шиам Гуанҷур  пешниҳод  намуд, ки  барои  дастгирии  рушди  савдои байналмилалӣ таҳти  васояти Палатаи  савдо  ва  саноати  ҶТ  маркази хидматрасонӣ  таъсис  дода шавад. «Тоҷикистон  ҳамчун  кишвари  узви Созмони  умумиҷаҳонии  савдо  бояд  мақомоте  таъсис  диҳад, ки  барои  пешниҳоди  иттилоот  дар  бораи  талаботи техникӣ  масъулият  дошта бошад»,  —  гуфт  Шиам  Гуанҷур.
Шариф  Саид  дар навбати  худ  ба  меҳмон  аз  самтҳои  афзалиятноки рушди  тиҷорати  Тоҷикистон  ва   густариши  иқтидори  содиротии он  нақл  кард.