Донишгоҳи давлатии Кӯлоб 70- сола мешавад

Душанбе, 16.09. 2014. (АМИТ «Ховар», Зарангези Латиф).- Соли 2015-ум Донишгоҳи давлатии Кӯлоб ба номи Абӯабдуллоҳи Рӯдакӣ 70 — сола мешавад. Ба муносибати таҷлили ҷашни мазкур тибқи қарори Ҳукумати Ҷумҳурии Тоҷикистон 1-уми сентябри соли 2015-ум Рӯзи дониш дар донишгоҳи мазкур бо шаҳомат таҷлил мегардад.
Ба  ифтихори таҷлили 70-солагии донишгоҳи мазкур баргузории як силсила чорабиниҳо дар назар дошта шудааст, аз ҷумла гузаронидани конфронси ҷумҳуриявӣ дар мавзӯи «Нақши Донишгоҳи давлатии Кӯлоб ба номи Абӯабдуллоҳи Рӯдакӣ дар тайёр намудани мутахассисон», ташкил ва  гузаронидани Форуми ихтироъкорони ҷавон оид ба технологияи инноватсионӣ, гузаронидани мусобиқаҳои варзишӣ барои дарёфти Ҷоми 70 — солагии Донишгоҳи давлатии Кӯлоб ба номи Абӯабдуллоҳи Рӯдакӣ, ташкил намудани осорхонаи «Ганҷинаи маърифат» ва дигар чорабиниҳо дар назар дошта шудааст.
Ҳамчунин барои таъмиру навсозии сохтмони бинои маъмурии Донишгоҳ , навсозии китобхона ва ғанӣ гардонидани фонди китобҳои электронии Донишгоҳ, васеъ намудани инфрасохтори Парки технологии донишгоҳ ба сохторҳои марбута дастуру супориш дода шуд.