Душанбе фардо мизбони Ҳасани Рӯҳонӣ мешавад

 Душанбе, 8.09.2014.(АМИТ «Ховар», Марзия Саидзода).-Фардо, 9 сентябр дар Рӯзи истиқлолияти Ҷумҳурии Тоҷикистон Ҳасани Рӯҳонӣ Президенти Ҷумҳурии исломии Эрон бо нахустин сафари расмӣ озими Душанбе-пойтахти Ҷумҳурии Тоҷикистон мегардад. Дар ин хусус 8 сентябр Абулфайз Атоев -сардори Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон зимни нишасти матбуотӣ ба хабарнигорон иттилоъ дод.
    Интизор меравад, ки Ҳасани Рӯҳонӣ зимни сафари расмиаш ба Тоҷикистон бо Президенти Ҷумҳурии  Тоҷикистон Эмомалӣ Раҳмон, раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ва Сарвазири Ҷумҳурии Тоҷикистон Қоҳир Расулзода мулоқот намуда,  масоили марбут ба таҳкими ҳамкориҳои мутақобилан судманди Душанбе ва Теҳронро матраҳ намояд.
       Ҳамзамон мулоқоти васеи ҳайатҳои Тоҷикистону Эрон доир гардида, дар он  маҷмӯи санадҳои ҳамкории ду кишвар дар бахшҳои мухталиф ба имзо расонида мешавад. Инчунин дар доираи сафари Ҳасани Рӯҳонӣ  ба Тоҷикистон мулоқоти сеҷонибаи сарони се кишвари форсизабон- Тоҷикистон, Афғонистон ва Эрон доир мегардад.
      Президенти Ҷумҳурии исломии Эрон дар ҷараёни сафараш ба Тоҷикистон  дар Академияи илмҳои ҷумҳурӣ бо аҳли илми Тоҷикистон мулоқот намуда, ҳамчун рамзи эҳтиром ба таъриху тамаддуни миллати тоҷик дар пояи муҷассамаи нахустин  поягузори давлати тоҷикон- Исмоили Сомонӣ гулчанбар мегузорад.