Эҳёи «Шоҳ Фаридун»-и Фаррухи Қосим

Душанбе, 16.09.2014. (АМИТ «Ховар», Лайло Тоирӣ).- Пагоҳ ба муносибати 66-умин солгарди зодрӯзи Фаррухи Қосим, коргардони шинохтаи тоҷик ва ҳунарпешаи театр, Ҳунарпешаи халқии Тоҷикистон, лауреати мукофоти давлатии ба номи А. Рӯдакӣ ҳамкасбон ва шогирдон  дар Театри тамошобини ҷавони «Аҳорун»-и ба номи М.Қосимов барои дӯстдорони санъати волои театрӣ намоишномаи «Шоҳ Фаридун»-ро пешниҳод менамоянд. 
Фаррухи Қосим солҳои тӯлонӣ (1969-1988) ба ҳайси актёр, баъдан ба ҳайси коргардон дар Театри академӣ -драмавии ба номи А. Лоҳутӣ фаъолият намудааст.
20 соли охири умри худро ин ҳунарманди шинохта дар Театри тамошобини ҷавон «Аҳорун»,  ки бо ибтикори ӯ соли 1990 таъсис шуд,  ба ҳайси коргардон, драматург ва ҳунарманд сипарӣ намуд. Ӯ дар ин муддат қариб 20 намоишнома ба саҳна гузошт, ки онҳо дар озмунҳои театрии Тоҷикистон ва Осиёи Марказӣ  соҳиби шоҳҷоизаҳо гашта, инчунин дар озмунҳои байналхалқии театрӣ дар Лаҳистон, Русия, Эрон ва Белгия иштирок намуданд.  
Намоишномаи «Шоҳ Фаридун»-ро Фаррухи Қосим  чандин сол қабл ба саҳна гузошта ва барои ин намоиш  дар ҷашнвораи театрии ҷумҳуриявии «Парасту» дар шаҳри Душанбе ҷоизаи «Беҳтарин кори коргардонӣ»-ро дарёфт карда буд.  Ёдовар мешавем, ки намоишномаи мазкур инчунин дар саҳнаи театрҳои Эрон низ ба тамошо гузошта шуда буд. 
   Қаблан нақшҳоро дар ин намоишнома ҳунармандони собиқадор, чун  худи Фаррухи Қосим, Сабоҳат Қосимова, Қурбони Собир, Салоҳиддин Алиев, Абдумуъмин Шарипов, Нозим Меликов ва дигарон иҷро карда буданд, аммо ин бор театр тавассути гурӯҳи нав истеъдоди ҳунармандони ҷавони худро пешкаши ҳаводоронаш мекунад. 
 Бояд зикр намуд, ки нақши  шоҳ Фаридунро дар ин намоишнома ба ҷои падараш Фирдавси Қосим-писари шодравон Фаррухи Қосим  иҷро мекунад.