Э. Раҳмон: Таъмини бехатарии мусофирон масъалаи муҳимтарин аст

Душанбе, 3.09.2014. (АМИТ «Ховар», Лайло Тоирӣ).- «Дар ҷаҳони муосир бунёди фурудгоҳҳои муосиру муҷаҳҳаз, баланд бардоштани сатҳу сифати хизматрасонӣ ва муоширати ҳайати хизматрасон, инчунин таъмини бехатарии мусофирон яке аз масъалаҳои муҳимтарини таҳкими имкониятҳои коммуникастионии ҳар кишвар ба шумор меравад»,- гуфт Президенти кишвар Эмомалӣ Раҳмон имрӯз зимни суханронӣ дар маросими ба истифода супоридани терминали нави «Фурудгоҳи байналмилалии Душанбе». Бо назардошти аҳамияти масъала дар Паёми имсолаи худ ба Маҷлиси Олии кишвар Сарвари давлат таъкид дошт, ки зиёд намудан ва ҳозиразамон гардонидани парки ҳавопаймоҳои ширкатҳои миллӣ, таҷдиди фурудгоҳҳои байналмилалии мамлакат, таъмин кардани онҳо бо техникаву таҷҳизоти муосир ва то ба дараҷаи меъёру талаботи байналмилалӣ баланд бардоштани сатҳи хизматрасонӣ яке аз самтҳои муҳими фаъолияти сохтору мақомоти дахлдор мебошад.«Мову шумо имрўз шоҳиди амалӣ гардидани нақшаву ниятҳои некамон мебошем, ки дар доираи он терминали нав ва аз ҳар лиҳоз муҷаҳҳази фурудгоҳи байналмилалии Душанбе ба истифода супорида шуд»,-илова намуд Эмомалӣ Раҳмон.