«Фортуна-К» 100 ҷои кор пешниҳод мекунад
Душанбе, 02.09.2014. (АМИТ «Ховар», Раъно Нусратуллозода).-То интиҳои соли ҷорӣ ҶДММ Корхонаи фаръии «Фортуна-К» дар шаҳри Хуҷанд ба кор оғоз менамояд.
Бино ба иттилои Хадамоти матбуоти раиси вилояти Суғд корхонаи мазкур барои истеҳсоли маҳсулоти чӯбӣ, аз қабили дару тиреза, фарш ва дигар маҳсулоти чӯбу тахтагӣ ва коркарди онҳо пешбинӣ гардидааст. Ин корхона дар Минтақаи озоди иқтисодии «Суғд» ҷойгир шуда, аз сехҳои коркарди чӯб, истеҳсоли дару тиреза рангубордиҳӣ ва ғайра иборат аст.
Роҳбарияти коргоҳ ният доранд то интиҳои соли равон корҳои васлу танзими таҷҳизот,истеҳсоли таҷрибавии маҳсулотро ба интиҳо расонанд. Коргоҳи мазкур наздик ба 100 нафар мутахассис ва хоҳишмандро бо ҷойи кор таъмин хоҳад кард.