Хуҷанд: 200 ҳазор сомонӣ зарар аз сӯхтор

Хуҷанд, 12.09.2014. (АМИТ «Ховар»,  Абдуаҳад Шарифзода).-  Дар 8 моҳи соли ҷорӣ дар миқёси шаҳри Хуҷанд 39 ҳодисаи нохуши сӯхтор ба қайд гирифта шуда, аз он 33 -тояш дар манзилҳои истиқоматии аҳолӣ рух додааст. 
Тавре ки ба «АМИТ» Ховар  нозири Назорати давлатии бехатарии сӯхторҳо дар шаҳри Хуҷанд лейтенант М.Азиззода иттилоъ дод, дар ҳашт моҳи соли ҷорӣ дар қаламрави шаҳр 39 ҳодисаи нохуши сӯхтор ба амал омада, маблағи зарари он 192  ҳазору 612  сомониро ташкил дод. Ин нишондод дар муқоиса бо ҳамин давраи соли 2013-ум 8 ҳодиса зиёд аст.  
Сабабҳои асосии сӯхтор- ин  беэҳтиётӣ нисбат ба оташ, истифодаи таҷҳизоти вайронаи гармидиҳии барқӣ, нодуруст истифода бурдани таҷҳизоти гази моеъ буда, аз шумораи умумии сӯхторҳои сарзада 14 ҳодиса ба вайрон будани таҷҳизоти гармидиҳии барқӣ, 10 ҳолат ба нодуруст пайвастани ноқили барқӣ вобаста аст.