Интиқоли ҳоҷиён ба Арабистони Саудӣ ба охир расид

Макка, 29.09.2014. (АМИТ “Ховар”,  Мавҷуда Анварӣ).-  Шаби  28-ум ба 29-уми сентябри соли ҷорӣ охирин ҳавопаймое, ки ҳоҷиёни Ҷумҳурии Тоҷикистонро ба мамлакати Арабистони Саудӣ барои адои маносики ҳаҷ интиқол медод, дар Фурудгоҳи байналмилалии шаҳри Ҷидда фуруд омад.
Дар ин бора Афшини Муқим, сардори маркази матбуоти Кумитаи оид ба корҳои дин, танзими анъана ва ҷашну маросимҳои миллии назди Ҳукумати ҶТ ба хабарнигори АМИТ «Ховар» хабар дод. 
Тибқи иттилои манбаъ, имрӯзҳо аъзои гурӯҳи корӣ ва роҳбаладони мавсими «Ҳаҷ-2014» машғули омодасозии хаймаҳо дар водии Мино ва Арафот мебошанд, ки мутобиқи меъёри иҷрои маносики ҳаҷ зойирин чанд рӯзе дар ин маконҳо иқомат хоҳанд дошт.
Ёдовар мешавем, ки дар мавсими ҷорӣ аз кишвари мо беш аз 6 ҳазор нафар барои адои маносики ҳаҷ ба Арабистони Саудӣ сафарбар гардид.