Истиқболи Рӯзи дониш дар ДМИТ

Душанбе, 02.09.2014. (АМИТ «Ховар», Раъно Нусратуллозода).-Дирӯз дар Донишкадаи молия ва иқтисоди Тоҷикистон суханронии Президенти Ҷумҳурии Тоҷикистон Эмомалӣ Раҳмон бахшида ба Рӯзи дониш, ки дар Донишгоҳи омӯзгории Тоҷикистон ба номи Садриддин Айнӣ баргузор гардид, аз ҷониби устодону донишҷӯён, кормандони донишкада ва меҳмонон аз тариқи телевизион шунида шуд.Тавре ки котиби матбуоти донишкада Машҳура Абдуллоева иттилоъ дод, баъдан ба ифтихори Рӯзи дониш бо иштироки муовини вазири молияи Ҷумҳурии Тоҷикистон Меҳринамо Ҷонмаҳмадова ва директори Маркази таҳия ва нашри китобҳои дарсии Вазорати маориф ва илми Ҷумҳурии Тоҷикистон Комил Исоев ҷаласа баргузор гардид. Дар ҷаласа ректори донишкада Ашурбой Солиев устодону донишҷӯёнро бо соли нави хониш муборакбод намуда, иброз дошт, ки баргузории Рӯзи дониш дар сатҳи умумимиллӣ далели ғамхориҳои пайваста ва ҳусни таваҷҷуҳи баланди Сарвари давлат ба илму маориф, донишу маърифат ва такя ба зиёиёну донишҷӯён мебошад, зеро воқеан, давлате, ки ба илму дониш ғамхорӣ зоҳир менамояд, давлати ояндадор ва тавонову соҳибтамаддун хоҳад гардид. Муовини вазири молия Меҳринамо Ҷонмаҳмадова гуфт, ки рушди тамоми соҳаҳои мамлакат ба маориф вобаста аст ва ӯ аз донишҷӯён даъват ба амал овард, ки аз шароитҳои беҳтарин ва устодони варзидаи ин донишкада истифода бурда, хубу аъло таҳсил намоянд ва мутахассиси касбии соҳаи молия ва иқтисод шаванд.Пас аз анҷоми ҷаласа меҳмонон аз бинои нави таълимӣ, ки барои факултаҳои менеҷмент ва ҳуқуқи иқтисодӣ ва муносибатҳои иқтисодии байналмилалӣ пешбинӣ шудааст, дидан карданд.Бинои мазкур аз 24 утоқи корӣ, 34 синфхона, 2 синфхонаи компютерӣ , 1 маркази тестӣ , 1толори варзишӣ ва маҷлисгоҳ иборат аст. Меҳмонон ба корҳои сохтмонӣ ва ташкилӣ баҳои баланд доданд.