Коҳиши нархи орд аз 210 ба 135 сомонӣ

Хоруғ 2.09.2014. (АМИТ «Ховар», Файз Мирасан).- Бо кумаку дастгирии Агентии давлатии захираҳои моддии назди ҳукумати ҷумҳурӣ дар шаҳру деҳоти дурдасти ВМКБ нархи маводи ниёзи аввал барои табақаҳои гуногуни ҷомеа дастрас мебошад. Чанде пеш дар деҳоти болоии водии Бартанг қимати орд то ба 200 сомонӣ расид ва танҳо бо дастгирии фаврии ин агентӣ нархи он ба 135 сомонӣ поин оварда шуд. Ба қавли сокинони ин водӣ дар баъзе аз деҳот нархи як халта орд то ба 210 сомонӣ мерасад. Дар деҳоти поёнии ҷамоати Савноб орд аз 180 то 195 сомонӣ қимат дорад. Бинобар ин Агентии давлатии захираҳои моддии назди Ҳукумати ҷумҳурӣ ин вазъиятро ба инобат гирифта, маводи муайяни хӯроквориро ба мисли орду шакар ва биринҷ бо нархи арзон барои сокинони деҳот дастрас намуд.Ҳоло нархи орд дар аксарияти деҳоти ин водӣ ҳамагӣ 135 сомонӣ, шакар 4,5 сомонӣ ва биринҷ панҷ сомонӣ мебошад.