Конибодом: «Донояк» ба истифода дода шуд

Душанбе, 18.09.2014. (АМИТ “Ховар”, Ситораи Боймурод).- Дар ҷамоати деҳоти ба номи Э. Шарипови шаҳри Конибодом кӯдакистони нави рақами 15 бо номи «Донояк» аз ҷониби сокинони деҳаи Маҳрам ба тариқи ҳашар навсозӣ гардида, пас аз фосилаи тӯлонии корношоямӣ ба истифода дода шуд.
Тавре ки дар ин бора хадамоти матбуоти раиси вилояти Суғд хабар додааст, кӯдакистон барои 120 нафар бунёд гардида, ҳоло дар 4 гурӯҳ тифлакон ба тарбия ва таълим фаро гирифта шудаанд. Бунёди кӯдакистони нав имкон додааст, ки 17 нафар занону духтарон соҳиби ҷои кори доимӣ гарданд.
Бо иқдоми сокинони маҳаллаҳо ва дастгирии мақомоти иҷроияи ҳокимияти давлатии шаҳр боз як кӯдакистони нав дар деҳаи Санҷидзори ҷамоати деҳоти Лоҳутӣ дар арафаи баистифодадиҳист.