Корманди ВКД-ро чӣ гуна муҷозот мекунанд?

Душанбе, 17.09.2014. (АМИТ «Ховар», Мавчуда Анварӣ).-   Агентии назорати давлатии молиявӣ ва мубориза бо коррупсия нисбат ба корманди Ротаи махсуси зудамали милитсияи Вазорати корҳои дохилӣ Шукуров Азаматулло Қурбоналиевич парвандаи ҷиноятӣ  оғоз кард.
Тибқи иттилои маркази матбуоти агентии мазкур,  ба агентӣ шаҳрванд Камолов муроҷиат карда, арз доштааст, ки корманди ВКД аз ӯ барои дохилшавӣ ба Донишкадаи тарбияи ҷисмонӣ ва гирифтани қитъаи замини наздиҳавлигӣ дар ҳудуди шаҳри Ваҳдат ҷамъ 24 ҳазору 900 доллари амрикоӣ пора гирифтааст. 
«Тафтишот муайян кард, ки боздоштшуда Камоловро ба ҳайси ронанда ба Ротаи махсуси зудамал ворид карда, тавсия медиҳад, ки дар оянда барои гирифтани рутбаи ҳарбӣ бояд маълумоти олӣ дошта бошад ва барои дохилкунӣ ба Донишкадаи тарбияи ҷисмонӣ 1000 доллар мегирад. Баъдан барои гирифтани замин дар Ваҳдат 23 ҳазору 900 доллари дигарро гирифта, ягон ваъдаи додаашро иҷро намекунад»-илова намуд манбаъ.
Дар айни замон    тафтиши парванда  идома дорад.