Кормандони фаъол сазовори ифтихорномаҳо гаштанд

Душанбе, 08.09.2014. (АМИТ «Ховар», Лайло Тоирӣ).- Ҳамасола дар арафаи иду ҷашнҳои давлатӣ иддае аз кормандон ва фаъолони Хадамоти муҳоҷират барои сари вақт ва бо сифати баланд ба роҳ мондани корҳои тарғиботию ташвиқотӣ  дар байни муҳоҷирони меҳнатӣ ва аъзои оилаи онҳо бо Ифтихорномаи сардори хадамот сарфароз мегарданд.
Имсол низ 4 нафар корманди Хадамоти муҳоҷират, аз ҷумла, сухангўи Хадамоти муҳоҷират, сармутахассиси шуъбаи муносибатҳои байналмилалӣ, робита бо ҷомеа ва ҳамватанони бурунмарзӣ — Абдуллоҳи Қодирӣ, сардори Раёсати Хадамоти муҳоҷират дар вилояти Суғд Зайнура Шарифова, сардори Раёсати Хадамоти муҳоҷират дар вилояти Хатлон Маҳмуд Хоркашев  ва сардори бахши Хадамоти муҳоҷират дар ноҳияи Шаҳринав Муҳибулло Бобоев бо мақсади ҳавасмандгардонӣ дар арафаи таҷлили 23-юмин солгарди Истиқлолияти Ҷумҳурии Тоҷикистон соҳиби ифтихорномаҳо гардиданд.
Сардори Хадамоти муҳоҷират Анвар Бобоев кормандонро барои фаъолияти пурсамар ва тарғибу ташвиқи самтҳои фаъолият, пурзўр намудани корҳои иттилоотию фаҳмондадиҳӣ дар байни аҳолӣ, инчунин бо ҷашни 23-юмин солгарди Истиқлолияти Ҷумҳурии Тоҷикистон табрик намуда, дастовард ва комёбиҳои назаррасро дар соҳаи муҳоҷират самараи истиқлолият маънидод кард.