«Кошонаи саодат» фаъол шуд

Душанбе, 19.09.2014. (АМИТ «Ховар», Лайло Тоирӣ).- Ташкилоти ҷамъиятии «Чашмаи ҳаёт» бо дастгирии молиявии Ташкилоти амонатии қарзии хурд «Арванд»   якҷоя бо Раёсати Хадамоти муҳоҷират дар вилояти Суғд, шуъбаи  кор бо занон ва  оилаи мақомоти иҷроияи ҳокимияти давлатии вилояти Суғд ва бахши кор бо занон дар шаҳру навоҳии Б. Ғафуров, Спитамен, Истаравшан ва Ҷ. Расулов давраи дуввуми маҳфили «Кошонаи саодат» — ро аз моҳи январи соли 2014 идома дод. 
Дар доираи лоиҳа занону духтарон, ки аксар аз оилаи муҳоҷирони меҳнатианд, аз одоби муошират, муносибати байниҳамдигарӣ аз нуқтаи равонӣ, роҳандозӣ намудани буҷаи оилавӣ, истифодаи оқилонаи маблағҳои интиқолшуда аз муҳоҷирони меҳнатӣ, одоби рӯзгордорӣ, ки бевосита ба муносибати зану шавҳар таъсири манфӣ ва мусбати худро мегузорад, ҳуқуқ ва уҳдадориҳои шаҳрвандон дар санадҳои меъёрии ҳуқуқӣ ва аз нигоҳи шариат, расонидани ёрии таъҷилии аввалини тиббӣ ва маърифати молиявӣ  бархурдор гаштанд.
Дар маҳфил ба 180 нафар роҳҳои хуби истифодаи буҷаи оилавӣ, банақшагирии буҷа, пасандоз ва захира, ба кадом нуқтаҳои Шартномаи меҳнатӣ, Шартнома дар бораи гифтани қарз барои харидории чиптаҳои ҳавопаймоӣ бояд эътибори ҷиддӣ дод, расондани ёрии аввалини таъҷилии тиббӣ  дар ҳолатҳои фавқулода омӯзонида шуд.