М. Ҷалолов ба П. Мукерҷӣ Эътимоднома супорид

 
Душанбе, 16.09.2014.(АМИТ «Ховар», Марзия Саидзода).- Сафири Фавқулода ва Мухтори Ҷумҳурии Тоҷикистон дар Ҷумҳурии Ҳиндустон Мирзошариф Ҷалолов ба Президенти Ҷумҳурии Ҳиндустон Пранаб Мукерҷӣ Эътимоднома супорид. Маросими супоридани Эътимоднома тибқи маросими ташрифотии кишвари иқомат дар Кохи Раштрапати Бҳаван баргузор гардид.  
Баъд аз маросими супоридани Эътимоднома мулоқоти Президенти Ҳиндустон бо Сафири Тоҷикистон доир гардид, ки дар оғози он дуруд ва таманниёти неки Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Ҳиндустон  Пранаб Мукерҷӣ расонида шуд.
      Аз Вазорати корҳои хориҷии ҷумҳурӣ ба АМИТ «Ховар» иттилоъ доданд, ки дар ҷараёни мулоқот дурнамои густариши ҳамкориҳои дуҷониба ва бисёрҷониба байни Тоҷикистону Ҳиндустон дар заминаҳои гуногун мавриди баррасӣ қарор гирифтанд. Рушди ҳамкориҳо дар соҳаҳои иқтисод, энергетика, маориф, тандурустӣ ва мудофиа ба манфиати ҷонибҳо арзёбӣ гардиданд. Ҳамкорӣ дар самти пешгирӣ аз хатарҳои муосири ҷадиди ҷаҳонӣ низ аз бахшҳои муҳими муносиботи Тоҷикистону Ҳиндустон маънидод гардид. Дар фарҷоми мулоқот дипломати тоҷик Президенти кишвари Ҳиндустонро итминон дод, ки тамоми саъю кӯшиши худро ҷиҳати таҳким ва рушди муносиботи ҳасанаи Тоҷикистону Ҳиндустон равона хоҳад кард.