Маҳфили адабии Зулфия

Душанбе, 19.09.2014. (АМИТ Ховар, Ситораи Боймурод).- Пагоҳ, 20-уми сентябр дар Қасри фарҳанги ноҳияи Ғончӣ маҳфили эҷодии Шоири халқии Тоҷикистон  Зулфия Атоӣ доир мегардад.
Дар маҳфил маҷмӯаҳои ашъори адиби маъруфи кишвар Зулфия Атоӣ пешкаши дӯстдорони шеър гардонида мешавад.
Ёдрас мешавем, ки Зулфия Атоӣ 15- уми июни соли 1954 дар деҳаи Қалъаи Азими ноҳияи Ғончӣ таваллуд шуда, хатмкардаи Институти адабии ба номи Максим Горкийи шаҳри Маскав  мебошад.
Ӯ муаллифи маҷмӯаҳои шеърии «Ҷиҳоз», «Дидор», «Меваи сабр», «Духтари дарё», «Ишқи як зан», «Зан агар ошиқ шавад», «Зулфи парешон» ва ғайра буда, шеърҳои ӯ бо забонҳои русӣ, англисӣ, фаронсавӣ, арабӣ, туркманӣ, руминӣ, украинӣ тарҷума ва интишор гардидаанд. 
Гуфта мешавад, ки Зулфия Атоӣ дорандаи ордени «Шараф», ордени «Дили Данко» (Русия), ҷоизаи адабии «Парвини Эътисомӣ» ва барандаи Ҷоизаи Иттифоқи журналистони Ҷумҳурии Тоҷикистон ба номи Абдулқосим Лоҳутӣ буда, соли 2009 бо Фармони Президенти Ҷумҳурии Тоҷикистон бо унвони ифтихории «Шоири халқии Тоҷикистон» сарфароз гардонида шудааст.