Муҳокимаи масоили оби нӯшиданӣ

Душанбе, 24.09.2014. (АМИТ «Ховар», Кристина  Эрлих). – Имрӯз,  24  сентябр,   дар  шаҳри  Душанбе  ҷаласаи  навбатии  Шабакаи  созмонҳои  мушорикон  оид ба таъмини доимӣ бо об ва  санитария баргузор  мешавад. 
Ҷаласа   бо  ибтикори  Оксфам  дар  Тоҷикистон ва дастгирии   молиявии  ҳукумати  Швейтсария  тавассути  Агентии  рушду  ҳамкории ин  кишвар  доир  мегардад.
Назар ба  хабари  Оксфам  дар  Тоҷикистон, дар  ҷараёни  ҷаласа маросими  муаррифӣ  ва натиҷагирии  мушорикони  шабака  дар  бораи  фаъолият  ва  масоили  таъминот  бо  оби  нӯшиданӣ ва  санитария  баргузор мешавад. 
Ёдовар  мешавем, ки Шабакаи   созмонҳои  мушорикон  оид ба  таъмини  доимӣ бо  об 12  ноябри соли  2009  барои  муттаҳид  сохтани  ҳамаи  созмонҳои   манфиатдор, аз  ҷумла  сохторҳои  ҳукуматии  Тоҷикистон, созмонҳои байналмилалию маҳаллии ҷомеаи  шаҳрвандӣ,   бахши  инфиродӣ  ва васоити  ахбори омма  таъсис  ёфта  буд.