Мулоқоти Д. Саид бо сафири Амрико дар Тоҷикистон

Душанбе, 18.09.2014. (АМИТ “Ховар”). — Имрӯз  муовини якуми Cарвазири Ҷумҳурии Тоҷикистон Давлаталӣ Саид бо сафири Амрико  дар  Тоҷикистон хонум Сюзан Эллиот мулоқот кард.
Дар мулоқот  масоили  ҳамкории  дуҷониба, аз ҷумла тақвияти ҳамкориҳои муштарак барои   татбиқи  лоиҳаи хатти барқии CASA-1000 баррасӣ шуд.
Тавре таъкид шуд, ҷониби Тоҷикистон  аз ҳамкории ҳарду кишвар дар татбиқи ин лоиҳаи бузурги минтақавӣ  изҳори қанотмандӣ менамояд.
Қайд  кардан  ба маврид аст,  ки аз ҳисоби Агентии рушди байналмилаллии Амрико 7,5 миллион доллари амрикоӣ барои татбиқи ин лоиҳа  ҷудо шудааст. Ҳамчунин Бонки ҷаҳонӣ барои татбиқи ин лоиҳа дар қаламрави Ҷумҳурии Тоҷикистон 45 миллион доллари амрикоӣ ҷудо намуда,  Бонки исломии Рушд бошад,  типқи нақша барои амалӣ шудани ин тарҳи бузурги минтақавӣ 70 миллион доллари амирикоӣ  сарамоягузорӣ менамояд. 
Хотиррасон мекунем, ки арзиши  қисмати тоҷикистонии лоиҳаи CASA-1000 314 миллион доллари амрикоиро ташкил медиҳад. Дар айни замон Ҷумҳурии Тоҷикистон  барои ҷалби сармояи хориҷӣ барои татбиқи ин лоиҳа бо Хазинаи  “Рушди иқтисодии Араб”,  Хазинаи “Саудии Рушд”, Хазинаи “ОПЕК”, Хазинаи “Абӯдабби”, Хазинаи “Қатар” ва Бонки аврупоии сармоягузорӣ  ҳамкории судманд дорад.