Мулоқоти Ш.Саид бо А. Смагулов

Душанбе, 01.09.2014. (АМИТ «Ховар», Лайло  Тоирӣ). – Ҳафтаи  гузашта раиси Палатаи  савдо  ва  саноати  ҶТ Шариф  Саид сафири  Қазоқистон  дар  Тоҷикистон  Оғибой  Смагуловро ба  ҳузур  пазируфт.
Назар  ба  хабари  маркази  матбуоти  ПСС ҶТ, ҷонибҳо  дар  ҷараёни  мулоқот  аз  рушди  равобити тиҷоратию  иқтисодии ҳар  ду  кишвар изҳори  қаноатмандӣ  намуданд. Қазоқистон  баъди Федератсияи  Русия  дуюмин шарики тиҷоратии  Тоҷикистон  ба  шумор  меравад. 
«Баъди роҳандозии ҷамъомадҳои аҳли тиҷорати ҳар  ду  кишвар муомилоти  молӣ байни  Остона  ва  Душанбе  босуръат рушду  густариш ёфта, ба барқароршавии  муносибатҳои   боварибахши  соҳибкорони Қазоқистону  Тоҷикистон  мусоидат  мекунад, — гуфт Оғибой Смагулов. Ба  имзо  расидани  даҳҳо қарордоду  созишномаҳои  ҳамкорӣ ва ҷалби сармояҳои  Қазоқистон ба  иқтисодиёти  Тоҷикистон  аз самарабахшии  ин  чорабиниҳо  шаҳодат  медиҳанд».
Мусоҳибон  ҳамчунин  масоилеро, ки дар Шӯрои аҳли  тиҷорати  СҲШ  баррасӣ  мешаванд,  мавриди  муҳокима  қарор  доданд.