Намоиши маҳсулоти «Маквиоли» ва «Шириниҳои Анас»

        Душанбе, 30.09. 2014.(АМИТ «Ховар», Марзия Саидзода).-Ҳудуди 10 корхонаю ширкати истеҳсолию хӯроквории пойтахт  дар остонаи иди саиди Қурбон, ки 5 октябр таҷлил мегардад,  маҳсулоти худро зимни баргузории намоишгоҳ дар бинои «Душанбе Плаза» 30 сентябр ба намоиш ва фурӯш гузоштанд.
         Шуҳратулло Фахриддин -мутахассиси пешбари Раёсати тиҷорати муассисаи давлатии «Душанбе Плаза» мегӯяд, ки ин шашумин намоишгоҳ аст, ки дар соли равони дар бинои мазкур бо ибтикори шаҳрдории Душанбе ба ифтихори ҷашни 90-солагии пойтахт созмон дода мешавад.
        Ҳадафи ташкили чунин намоишгоҳ агар аз як сӯ муаррифии маҳсулоти корхонаҳои саноатии пойтахт, ҷалби ҳарчи бештари муштариён ва паст бурдани нархи маҳсулоти ғизоӣ дар пойтахт, хусусан дар арафаи ҷашну идҳои суннатӣ бошад,  аз ҷониби дигар он ба рушди соҳибкорӣ дар пойтахт ва рақобатпазир гардонидани маҳсулоти истеҳсолнамудаи ширкату корхонаҳои истеҳсолии ватанӣ мусоидат менамояд. Бояд тазаккур дод, ки нархи маҳсулоти аз ҷониби корхонаҳои саноатии пойтахт, назири «Маквиоли», «Шириниҳои Анас», «Фабрикаи шири саодат» , «Корхонаи қаннодии Ширин» , «Комбинати полиграфии Душанбе», «Созтарош», «Рангинкамон равшан» ба намоиш ва фурӯш гузошта шуда дар қиёс ба нархи бозор 5 дарсад паст аст.