Оғози мумфаршкунии роҳҳо дар истаравшан

Душанбе, 11.09.2014. (АМИТ «Ховар», Зарангези Латиф).-Зимни сафари кории раиси вилояти Суғд Абдураҳмон Қодирӣ ба Истаравшан мумфаршкунии боз як кӯчаи маҳаллаи Ясии ҷамоати деҳоти Гули Сурх  ба масофаи 500 метр оғоз шуд.
Гуфта мешавад, ки кӯчаи мазкур аз ҳисоби мақомоти иҷроияи ҳокимияти давлатии вилоят таъмир шуда, иқдоми ҷавобӣ ба ташаббуси сокинони маҳалла аст, ки худ низ ба кори навсозии кӯчаҳо бо ҷидду ҷаҳди зиёд даст задаанд. Аҳли ин деҳа бо ҷалби соҳибкорони хайрхоҳ ва маблағи ҷамънамудаи худи сокинон беш аз 8 километр кӯчаҳои дохили маҳалларо пурра қирпӯш кардаанд ва бо мумфаршкунии кӯчаи мазкур муаммои роҳҳои ин мавзеъ пурра ҳал хоҳад шуд. Қабл аз мумфаршкунӣ, бо ташаббуси мардуми маҳал ва кумаки соҳибкорон муаммои таъминот бо оби нӯшокӣ низ аз байн бурда шуд.