Омӯзгорон аз аттестатсия мегузаранд

 
Душанбе, 1.09.2014. (АМИТ «Ховар», Мавҷуда Анварӣ).-  Сардори Давлат Эмомалӣ Раҳмон Вазорати маориф ва илмро вазифадор кард, ки аз оғози соли таҳсили 2014-2015 аттестатсияи пурраи омӯзгорон ва роҳбарони муассисаҳои таълимии кишварро ба роҳ монад.
Президенти кишвар зимни суханронӣ дар тантанаҳои Рӯзи дониш ва дарси сулҳ зикр кард, ки таҷрибаи таърихӣ шаҳодат медиҳад, ки афроди босаводу донишманд барои ҳар як давлату миллат сарвати бебаҳо ва неруи тавонои зеҳнӣ ба шумор мераванд.
Э. Раҳмон зарур шуморид, ки Вазорати маориф ва илм доир ба таъмини сифати таълиму тарбия, таҳияи нақшаву барномаҳои нави таълимӣ, китобҳои дарсӣ ва дастурҳои методӣ, махсусан барои ихтисосҳои омӯзгорӣ чораҷӯӣ намуда, дар самти ҷорӣ кардани усулҳои наву фаъоли таълим бо истифода аз технологияҳои иттилоотиву иртиботӣ ба донишгоҳ мусоидат намояд.