Пирӯзии тими мунтахаби ҷавонон ба дастаи Сингапур
Душанбе, 15.09.2014. (АМИТ “Ховар”, Ситораи Боймурод).- Футболбозони тоҷик дар нахустин даври сабқати гурӯҳӣ дар Бозиҳои XVII осиёӣ, дирӯз ба мунтахаби Сингапур пирӯз шуданд. Ин бозӣ дар варзишгоҳи «Ансан-Ва» баргузор гардид.
Бино ба иттилои сомонаи Кумитаи миллии олимпии кишвар голи ягонаро ҳимоятгар Сиёвуш Асроров дар дақиқаи 87-ум ба самар расонд ва ҳамин тавр тими мунтахаби Тоҷикистон бо ин ғолибият се имтиёз ба даст овард.
Ёдрас мешавем, ки дар мусобиқаи футбол аз рӯи барномаи Бозиҳои XVII осиёӣ, ки то 2 октябр дар Инчони Куриёи Ҷанубӣ баргузор мешавад, 29 дастаи мунтахаби мардона (U-23) ширкат меварзад. Бар асоси қуръакашӣ дастаҳо ба 8 гурӯҳ тақсим шудаанд. Панҷ гурӯҳ аз чаҳордастаӣ ва се гурӯҳ аз седастаӣ иборатанд. Аз ҳар гурӯҳ ду дастаи беҳтарин ба 1/8 финал мебарояд. Дастаи мунтахаби футболи Тоҷикистон мувофиқи натоиҷи қуръакашӣ ба гурӯҳи «С» ҳамроҳи тимҳои Уммон, Фаластин ва Сингапур шомил аст. Дар мавриди ба даври ҳаштякниҳоӣ роҳ ёфтани мунтахаби Тоҷикистон рақибаш яке аз тимҳои гурӯҳи «D» (Ҷопон, Кувайт, Ироқ ва Непал) мешавад.