Рейди муштараки «Тоҷикстандарт» ва «Тоҷикматлубот»

Хоруғ, 2.09.2014. (АМИТ «Ховар», Файз Мирасан).- Мутахассисони раёсати «Тоҷикстандарт» муштаракан мутобиқи нақша дар бозори марказии шаҳри Хоруғ сифати маҳсулоти кишоварзӣ, аз қабили ширу гӯшт, меваю сабзавот ва маводи ғизоиро мавриди санҷиш қарор доданд.Ҳадаф аз баргузории чунин санҷишҳо таҳкими қонун дар бораи ҳимояи ҳуқуқи истеъмолкунандагон, бехатарии маҳсулот, ба талаботи стандартӣ мувофиқ кардани хизматрасонӣ дар бозор мебошад, зеро ба қавли коршиносони соҳа баъзе аз тоҷирону фурӯшандагони маводи хӯрокӣ ва маҳсулоти кишоварзӣ талаботҳои умумии стандарт ва беҳдоштию гигиениро риоя накарда, бо ҳамин саломатии харидоронро дар хатар мегузоранд. Дар ҳоле, ки ҳар як бозор бо сертификати мутобиқат таъмин буда, сари ҳар чанд вақт тоҷирону соҳибкорон бо қоидаҳои умумии стандарт ошно мешаванд. Ба гуфтаи мудири бахши шуъбаи назорати ин раёсат Озодбахт Мародҳусейнов дар давоми ду рӯз фаъолияти 13 мағоза, 6 ошхона ва 7 дӯкони гӯштфурӯшӣ мавриди санҷиш қарор дода шуд.