С. Аслов ҳайати бонуфузи Қатарро ба ҳузур пазируфт

Душанбе, 19.09.2014.(АМИТ «Ховар», Марзия Саидзода).- Вазири корҳои хориҷии Ҷумҳурии Тоҷикистон Сироҷидин Аслов  ҳайати баландпояи Давлати Қатарро, ки таҳти роҳбарии  раиси Шӯрои директорони холдинги “Издон”  шайх Холид ибни Сонӣ оли Сонӣ ба Душанбе ташриф овардааст, ба ҳузур пазируфт. 
         Аз Вазорати корҳои хориҷии ҷумҳурӣ ба АМИТ «Ховар» иттилоъ доданд, ки дар мулоқот масоили марбут ба муносибатҳои дуҷониба байни Тоҷикистону Қатар, имкониятҳои сармоягузорӣ, таъсиси аввалин бонки исломӣ дар Ҷумҳурии Тоҷикистон, суғуртаи исломӣ, тандурустӣ ва бунёди фондҳои хайриявӣ матраҳ гардиданд. Ҳайати қатарӣ зимни мулоқот изҳори омодагӣ намуд, то дар татбиқи лоиҳаҳои кишвари мо иштироки фаъол дошта бошад.