Сафари расмии Р. Раҳимзода ба Қирғизистон

Душанбе, 08.09.2014. (АМИТ «Ховар», Муқаддас Темурзода).-Рӯзҳои 4-6-уми сентябри соли 2014 вазири корҳои дохилии Ҷумҳурии Тоҷикистон Рамазон Раҳимзода ҷиҳати иштирок дар ҷаласаи навбатии Шӯрои вазирони корҳои дохилии давлатҳо-иштирокчии Иттиҳоди Давлатҳои Мустақил дар Ҷумҳурии Қирғизистон бо сафари расмӣ қарор дошт.
ВКД ҶТ хабар медиҳад, ки дар доираи сафари мазкур, 4-уми сентябр, дар шаҳри Чолпон-Отаи Ҷумҳурии Қирғизистон Рамазон Раҳимзода бо вазири корҳои дохилии Ҷумҳурии Қирғизистон Абдулда Суранчиев вохӯрӣ  намуд.
Дар  вохӯрӣ ҷонибҳо масоили ҳамкориҳои дуҷонибаро дар самти мубориза бо ҷинояткорӣ, аз ҷумла ҷиноятҳои муташаккил, терроризм, экстремизм, гардиши ғайриқонунии маводи мухаддир, яроқу аслиҳа, хариду фурӯши одамонро муҳокима намуданд.
Пас аз анҷоми вохӯрӣ Созишнома оид ба ҳамкорӣ байни вазоратҳои корҳои дохилии Тоҷикистону Қирғизистон ба имзо расонида шуд, ки он ҳамкориҳои наздисарҳадӣ, мубодилаи иттилоот, ҷустуҷӯи шахсони дар кофтуков қарордошта ва дигар таҳдидҳоро бо истифода аз технологияи муосир дар бар мегирад.