Савганди 14 донишҷӯи тоҷик дар ДҲС

Душанбе, 4.09.2014. (АМИТ «Ховар», Мавҷуда Анварӣ).- Имсол 14 нафар фарзанди кормандони Агентии назорати маводи нашъаовари кишвар барои хониш ба мактаби олии Русия равон  шуд.
Дар Рӯзи дониш дар Донишкадаи ҳуқуқии Сибир (ДҲС)-и Хадамоти Федеролии Федератсияи Русия оид ба назорати маводи нашъаовар маъракаи супоридани дафтарчаи донишҷӯӣ ба донишҷӯёни факултаи умумӣ-ҳуқуқӣ ва факултаи омодагии мутахассисони хориҷӣ баргузор гардид.
Сардори донишкада И. Медведев донишҷӯёни бахши аввалро табрик намуда, изҳори боварӣ намуд, ки ин донишҷӯён кӯшишу ғайрати худро баҳри аз худ намудани касбу малака равона менамоянд. 
Донишҷӯёнро бо иди касбиашон роҳбарони идораҳои зиддимухаддиротии кишварҳои ИДМ, аз ҷумла аз Ҷумҳуриҳои Қирғизистон, Тоҷикистон ва Осетияи Ҷанубӣ табрик намуданд.
Худи ҳамон рӯз курсантони бахши аввал барои мартабаи корманди мақомоти назорати маводи нашъаовар савганд ёд намуданд.
Тибқи анъана ба мақбараи ёдгории кормандоне, ки ҳангоми хизмат фавтидаанд, гул гузоштанд.
Чорабинӣ бо гузашти тантанавии кормандони ҷавони мақомоти назорати маводи нашъаовар — курсантони бахши 1-3-и Донишкадаи ҳуқуқии Сибир анҷом ёфт.