Ш. Саид : «Вақти амал расидааст»
Душанбе, 22.09.2014. (АМИТ «Ховар», Кристина Эрлих).-Дар охири ҳафтаи гузашта дар ҳошияи Намоишгоҳи байналмилалии амволи содироти «ноҳияи мухтори Синҷону Уйғури ҶМЧ- Тоҷикистон 2014» Форуми соҳибкорони ноҳияи мухтори Синҷони Уйғур ва Тоҷикистон баргузор гардид.
Дар ин бора аз ПСС ҶТ ба АМИТ «Ховар» хабар доданд.
«Имрӯз бо дастгирии ҶМЧ дар ҷумҳурӣ лоиҳаҳои ҳаҷман калон дар амал татбиқ гардида, ҳамкории иқтисодӣ бо суръат ривоҷ ёфта, равобит дар бахшҳои илму техника густариш меёбад. Чин дар сиёсати иқтисодии хориҷии Тоҷикистон мавқеи бартариятро касб намудааст», — қайд намуд раиси Палатаи савдо ва саноати Тоҷикистон Шариф Саид.
Шариф Саид ба манзури такмили инфрасохтори нақлиётӣ, ташаккулу таҷдиди роҳҳои транзитии нақлиёт пешниҳод намуд, ки ба тиҷорати мутақобила ва сармоягузорӣ бештар вусъат бахшида, масоили осон гардонидани тартиби тиҷорат ва истифодаи судманди неруи ҳамкории тиҷоратии минтақавӣ ҳал карда шаванд. «Вақти амал расидааст», афзуд Шариф Саид.
Мувофиқи суханони раиси Палатаи савдо ва саноати кишвар, Тоҷикистон ҷонибдори ҳамкорӣ бо Ҷумҳурии Мардумии Чин дар бахшҳои истеҳсоли муштараки маводи сохтмонӣ бо истифода аз ашёи хоми маҳаллӣ, бунёди иншоотҳои шаҳвандию саноатӣ, истеҳсоли маснуот аз пахта, абрешим ва ғайра мебошад.
Дар ҷараёни Форуми соҳибкорон маросими муррифии ширкатҳои Чин ва корхонаҳои Тоҷикистон, ҳамчунин гуфтушуниди аҳли тиҷорати ҳар ду кишвар баргузор гардид.
Тарҷумон, М. Шарифзода.