SHERATON» -ро ба истифода медиҳанд

 
   Душанбе, 4.09.2014.(АМИТ “Ховар”,Марзия Саидзода).- 6 сентябр дар остонаи ҷашни Истиқлолияти давлатии Ҷумҳурии  Тоҷикистон дар Душанбе боз як меҳмонхонаи замонавии панҷситорадор -«SHERATON» мавриди баҳрабардорӣ қарор дода мешавад. Интизор меравад, ки дар маросими ифтитоҳи он Президенти кишвар, роҳбарияту намояндагони шаҳрдории Душанбе ва меҳмонон иштирок намоянд.
    Меҳмонхонаи «SHERATON» аз ҷониби ширкати «CHL International» -и Ҳиндустон дар кӯчаи Айнии Душанбе дар маcоҳати беш аз 24 ҳазор метри мураббаъ бо харҷи 55 миллион $ бунёд шудааст. Меҳмонхонаи «SHERATON» аз 15 ошёна иборат буда, дорои 148 ҳуҷра, тарабхона, толори зиёфат, ҳавзи шиноварӣ, қаҳвахона ва дигар имкониятҳои беҳтарини хизматрасонист.
     Сохтмони меҳмонхонаи панҷситорадори «SHERATON» 9 сол муқаддам, моҳи июли соли 2005 оғоз гардида, дар бунёди он дар қатори сохтмончиёни хориҷӣ, инчунин мутахассисони маҳаллӣ саҳм гузоштаанд. Интизор меравад, ки баробари ба фаъолият оғоз кардани меҳмонхонаи «SHERATON» беш аз 180 нафар шаҳрванд соҳиби ҷои кори доимӣ гардад.
   Меҳмонхонаи «SHERATON» марбут ба ширкати маъруфи амрикоии “Starwood” буда,  ин ширкат дар 100 кишвари ҷаҳон беш аз  1100 меҳмонхонаю истироҳатгоҳ дорад, ки қисмати бештараш таҳти тамғаи «SHERATON» фаъолият менамояд.